Gen 10 | MEU | STEP | Noa natuna tatoisi, Sem bona Ham bona Iafet, garadia bini, utu-utu badana murinai e havaradia.

Genesis 10

Noa garana

1 Noa natuna tatoisi, Sem bona Ham bona Iafet, garadia bini, utu-utu badana murinai e havaradia.

2 Iafet natuna bini: Gomere bona Magog bona Madai bona Iavan bona Tubal bona Mesek bona Tira. 3 Gomere natuna bini: Asakena bona Rifat bona Togarama. 4 Iavan natuna bini: Elisa bona Tarasisi; bona Kitim besena bona Dodanim besena danu ia ese e havaradia. 5 Idia edia amo kone taudia iboudiai e vara, edia bese idau-idau ai bona edia gado idau-idau ai.

6 Ham natuna bini: Kusu bona Misraim bona Put bona Kanaan. 7 Kusu natuna bini: Seba bona Havila bona Sabata bona Raama bona Sabateka. Raama natuna bini: Seba bona Dedan. 8 Kusu ese danu Nimrod e havaraia; ia na lohia tauna gini-gunana tanobada ai. 9 Ia danu hetaraki tauna mai goadana Iehova vairanai; una dainai taunimanima edia hereva ta e tomu “Hetaraki tauna mai goadana Iehova vairanai, Nimrod bamona”. 10 Matamana ai ena basileia na Babel bona Ereke bona Akad bona Kalne, Sinara tanona ai. 11 Una tano amo e raka lasi, Asuria ela, Nineve hanuana e hadaia, ariarana mai lababadia e kara. Kala hanuana danu e hadaia, 12 bona Resene, Nineve bona Kala padadiai: ia na hanua bada-hereana. 13 Misraim ese e havaradia besedia bini: Ludim bona Anamim bona Lehabim bona Napatuhim 14 bona Patarusim bona Kasaluhim bona Kaftorim. Filistia taudia na Kasaluhim besena amo e vara.

15 Kanaan natuna bini: Sidono, tau roboana, bona Het. 16 E havaradia besedia danu bini: Iebusu bona Amoro bona Girigasa 17 bona Hivi bona Araka bona Sini 18 bona Aravada bona Semara bona Hamat. Gabeamo Kanaan iduhudia na e karoho, kaha idau-idau ai eha noho; 19 edia tano na Sidono amo e laomu ela bona Gasa, Gerara kahana ai, bona Lasa, Sodoma bona Gomora bona Adma bona Seboimi kahadia ai. 20 Ini iboudiai, mai edia iduhu idau-idau bona edia gado idau-idau bona edia tano idau-idau bona edia bese idau-idau na Ham ena amo e vara.

21 Sem danu, Iafet kakana, Ebere natuna tamadia, natuna mamaruanedia haida ma e havaradia. 22 Sem natuna bini: Elam bona Asuru bona Afasad bona Lud bona Aram. 23 Aram natuna bini: Usu bona Hulu bona Getere bona Masa. 24 Afasad ese Sela e havaraia, bona Sela ese Ebere e havaraia. 25 Ebere natuna mamaruanedia na rarua. Ta ladana na Peleg, ^{▼▼anina be “e haria”.} badina be iena nega ai tanobada besedia na e haheparara. Tadina ladana na Iokotan. 26 Iokotan natuna bini: Alamodad bona Selefe bona Hasaramavete bona Iera 27 bona Hadoram bona Usala bona Dikila 28 bona Obala bona Abimael bona Seba 29 bona Ofiri bona Havila bona Iobab. Ini iboudiai na Iokotan natuna. 30 Edia tano na Mesa amo e laomu, mairiveina ororona ladana Sefara kahana ai. 31 Ini iboudiai, mai edia iduhu idau-idau bona edia gado idau-idau bona edia tano idau-idau bona edia bese idau-idau na Sem ena amo e vara.

32 Noa natuna garadia bini, edia uru ai bona edia bese ai: idia edia amo tanobada besedia iboudiai e vara, utu-utu badana murinai.